د رئیس پیغام
د یوې اسلامي ټولنې وده او پرمختګ د پیاوړي علمي او تحصیلي نظام پورې اړه لري، خو زموږ پر ګران هېواد د څلورو لسیزو جګړو د تېرېدو له امله یادې برخې ته د پام وړ توجه نده شوې.
په همدې اساس د عبد الله بن مسعود رضي الله عنه جامعه تر فتحې مخکې په (۱۴۴۰) هجري قمري کال کې د افغانستان اسلامي امارت لخوا د یو دیني – تخصصي او تحصیلي بنسټ په توګه تأسیس شوه او د (۱۴۴۳) هجري قمري کال راهیسې د لوړو زده کړو وزارت تر چتر لاندې د یو خپلواک رسمي اداري واحد په توګه د هېواد په علمي او تحصیلي ډګر کې د اوسني عصر د دیني او علمي اړتیاوو په نظر کې نیولو سره هېوادوالو ته خدمت وړاندې کوي.
یاده جامعه کې د دیني علومو په برخه کې د تخصص (دوکتورا) تر کچې لوړې زده کړې ترسره کیږي، چې تر اوسه پورې د افتاء او قضاء تخصص څخه لسګونه فاضلان فارغ او ټولنې ته د خدمت لپاره وړاندې شوي دي.
د عبد الله بن مسعود رضي الله عنه جامعه ویاړي، چې د تأسیس له لمړۍ ورځې څخه تر ننه د دیني تخصصاتو په برخه کې هېوادوالو ته معیاري تحصیلي خدمات وړاندې کوي او کوښښ کوي، چې د معیاري تدریس او عصري مېتودونو څخه په استفادې د دیني علومو داسې متخصص ځواک ټولنې ته وړاندې کړي، چې په اړونده برخه کې د هېوادوالو ټولو دیني او معاصرو اړتیاوو ته ځواب ویونکی واوسي.
اوس د هېواد ټول قدرمن فاضلان کولی شي، چې د ټولو دیني او دنیوي اړتیاوو په نظر کې نیولو سره له دې موقع نه استفاده وکړي او د دیني علومو په برخه کې خپله وړتیا لوړه کړي.
مفتي احسان الله احسان
د عبد الله بن مسعود رضي الله عنه جامعې رئیس